Текст службы воспроизводится по машинописи, полученной из Маросейской общины, в связи с чем в тексте возможны неточности и(или) опечатки.

Месяца июня в 9-й день
Служба святому праведному Алексию, пресвитеру Московскому
НА МАЛОЙ ВЕЧЕРНИ
На Г осподи воззвах: стихиры, глас 1.
Подобен: Н ебесных чинов:

Л юбовию Божественною исполнен, / теплую молитву о страждущих и скорбящих / ко Всемилостивому Спасу непрестанно возносиши, / дивный старче Алексие.
Д осточудне отче Алексие, / молитися не престай о нас; / прощение прегрешений и веры укрепление испроси, / яко еси скорый помощник и утешитель / всем прибегающим к тебе.
В о дни скорби и гонений / любовь Христову проповедал еси, отче, / силою ея побеждая власти тьму, / и направи чада твоя / ко спасению вечному.

Слава, глас 6:

Старчества святых отец наследниче, / в трудех и молитве созидаше душу твою, / сокровищницу благих даров соделал еси ю, / из неяже истекоша живительныя струи / жаждущим нетленныя жизни, / преславне старче Алексие.

И ныне:

Деву и Матерь, / Младенца и Превечнаго Бога паче ума рождшую, / Пресвятую Богородицу Марию воспоим, вернии; / Та бо непреложная Заступница рода христианскаго.

На стиховне стихиры, глас 2.
Подобен: Д оме Евфрафов:

Д аровася тобою / державе Российстей радость велия, / старче праведне Алексие; / ты бо обрел еси дерзновение пред Господем / молитися о спасении нашем.

Л учами Света Божественнаго облистаемь, / светоносне старче, предстал еси, / просвети и ныне / души славящих тя / светом нетления.
Стих: С вященницы твои облекутся в правду, / и преподобнии Твои возрадуются.
Т аинницы Пресвятыя Троицы, / старче Алексие и священномучениче Сергие, / с велием сонмом святых земли Русския, / молите спастися отечеству нашему / Православныя веры утверждением.

Слава, глас 8:

Отче Алексие люботрудне, / молитвенниче теплый о всех притекающих к тебе, / милующим сердцем утоляеши всякия скорби, / даруя радость духовную, / со апостолом, учеником возлюбленным / заповедуеши братии в любви пребывати.

НА ВЕЛИЦЕЙ ВЕЧЕРНИ
На Г осподи воззвах: стихиры, глас 5.
Подобен: Р адуйся:

Р адуйся, граде Москва, / обретши сокровище нетленное, / целебныя мощи праведнаго старца Алексия, / яко пресветлую зарю солнечную, / Божественною благодатию источающии преславная чудеса. / Темже сошедшеся празднственно ликующе возопиим: / о всечудне отче Алексие, / моли прославльшаго тя Господа / даровати отечеству нашему мир и велию милость.
Р адуйся, земле Российская и торжествуй, / днесь бо прославляем Троицы Единосущныя вернаго служителя, / старца Московскаго Алексия, / кротостию бурю злобы умиряющаго, / молитве и вере в неизреченное милосердие Божие научающаго, / заблудших на стезю спасения наставляющаго. / Егоже молитвами, Человеколюбче Господи, / низпосли людем Твоим мир и велию милость.
К расуйся, Церкве Русская, / память всесветлую досточуднаго Алексия возвеличи днесь; / мы же песненными похвалы воспоим, глаголюще: / радуйся, Божественныя любве светильниче, / скорый помощниче бедствующим и недужных исцелителю, / всемудрый наставниче ищущим спасения, / покаяния и терпения скорбей очистительных проповедниче. / И ныне не престай молити Владыку Вседержителя / умирити мир и спасти души наша.
Р адуйся, преславне Алексие, / благих родителей отрасль пречестная, / смиренно волю свою отсекая, материнскую же исполняя, / на путь священства вступи и в сем ревностно подвизался еси; / незлобиво обиды и нужду претерпевая, козни вражия победил еси; / и до конца последовав Христу, явился еси сосуд избран даров Святаго Духа. / Радуйся, старчества святых отец преемниче; / радуйся, столпов оптинских собеседниче; / с нимиже днесь Престолу Святыя Троицы предстоиши, / моля даровати душам нашим велию милость.

Ина стихира, глас 6.
Подобен: В се отложше:

О гнем любве Божественныя распалаемь, / добродетелей сияя светлостию, / старче праведне Алексие, / токи живительныя любве сея излиял еси, / напаяя скорбящих сердца радостию, / врачуя язвы грсховныя и страстей недуги, / светоносными лучами веры прогоняя власти тьму, / и всяку слезу изсушая теплотою молитв твоих. / Да тя вси, яко светильника Божия и отца чадолюбива, / ныне величаем.

Ина стихира, глас 4.
Подобен: Я ко добля:

Д арами духовными от Бога украшенный, / Тому Единому послужил еси, / яко сострадателен, яко благолюбивый, / милосердие Божие призывая; / отчаянных утешая и пропавших на поле брани сродником возвращая, / нестроения и раздоры семейныя примиряя, / недужных исцеляя, от пагубных страстей свобождая, / ищущих спасения послушанию и покаянию научая, / и всех любовию и молитвою твоею покрывая, старче преславный Алексие.

Слава, глас 2:

В лике святых земли Русския просиял еси избранниче Божий, / молитвенным бо заступлением святителя Филарета рождение твое благопоспешно свершися, / вхождение в Небесныя обители благословением исповедника патриарха Тихона препровождаемо бысть, / праведным Иоанном к служению старческому призванный, дарами духовными исполнися; / будущее яко настоящее провидя, помощь и исцеление щедро подавал еси; / любовию окрыляя, верою укрепляя и радостию исполняя сердца просящих тя, отче Алексие.

Вход, прокимен дне и чтения.
На литии стихиры, глас 3:

Наста днесь светлый праздник / обретения честных мощей праведнаго старца Алексия, / приидите вси вернии, / прославим Преблагаго Бога нашего, / даровавшаго нам сокровище неизъемлемо, / граду нашему твердую стену, / Отечеству крепкаго предстателя, / и молитвенника о душах наших.

Ины стихиры, глас 1:

Веру Христову, яко свет на свещнице поставил еси, / тьму богоотступничества осиявая светом Божественным, / и многи от неверия и отчаяния ко спасению приведе, / старче Московский Алексие.
Ч ист сердцем и душею, / выну предзрел еси Господа пред собою, / молитвою слезною врачуя немощи и болезни душевныя и телесныя, / благодатне отче Алексие.
Я ко весь Христу приближаяся яснейши, / не посрами ны, верою уповающих на тя, / дивный старче Алексие, / грехов прощения у Христа прося / и восприятия жизни вечныя.

Слава, глас 6:

Старче предивне Алексие, / споспешествуй нам, чадом твоим, / на видимыя и невидимыя враги наша; / имаши бо на сие от Бога данную ти силу, / исповедниче, молитвенниче и истинный угодниче Христов. / Да избавимся от всякаго зла / твоими, святе, молитвами.

И ныне, Богородичен.
На стиховне стихиры, глас 8:

Любовию и состраданием преисполнен, / милосерде отче Алексие, / тяготы и скорби страждущих понесл еси, / скорый помощник и утешитель тем быв. / Предстательствуй ныне и о нас, молим ти ся.
Стих: С вященницы Твои облекутся в правду, / и преподобнии Твои возрадуются.
«П окайтеся же, чадца моя», / - с любовию взывал еси, отче, / - неизреченно бо милосердие Владычне; / Отец бо приемлет чада своя на вечери, / идеже присно закалает ти ся Единородный Сын Отчий, / возставляя падшее грехом человеческое естество.
Стих: Б лажен муж, бояйся Господа, / в заповедех Его восхощет зело.
«В озлюбим друг друга, братие, / яко любы от Бога есть», / - вслед за Богословом взывал еси отче, / - Христос бо по нас душу Свою положи; / и мы должни есмы себе утесняя, / житие ближних облегчати.

Слава, глас 2:

Егда на Христа и Церковь Святую пребеззаконии ополчахуся, / тогда на всенощнобденную молитву вернии собирахуся; / и храм твой - корабль спасения / посреде волн злобы к тихому пристанищу мудрым кормчим управляем бысть. / Ты же пророчески возвещая, уверял еси, отче: / «Возстанет вера православная».

И ныне, Богородичен.
Тропарь, глас 5:

Помози в бедах, утеши в скорбех, / пастырю добрый, отче Алексие, / подвигом бо старчества миру просиявый, / веру и любовь Христову во мраце беззакония исповедал еси, / болезнуя сердцем о всех притекающих к тебе. / И ныне за ны Бога моли, / любовию чтущия тя.

НА УТРЕНИ
По 1-м стихословии седален:

На милосердие Божие посреде бури жестокия уповати призываху, паству от звероуловления огради, на пажити покаяния и любве воспитал еси ю, чадолюбиве отче; да внидут вкупе с тобою в пакибытие вечное.

Слава и ныне, Богородичен:

Едина Пречистая Дево и Мати, Единаго от Святыя Троицы неизреченно рождшая; Того моли, Милосердая, помиловати души наша.

По 2-м стихословии седален:

Покаяния ревнителю, слезами и молитвою пустыню сердечную многомятежнаго града возделал еси; долготерпение Владычне прославляя и милость к заблудшим призывая, плодоносну верою и надеждею ю сотвори.

Слава и ныне, Богородичен:

Жизнь миру рождшая, Дево Всенепорочная, не презри мольбы убогих и немощных, Всеблагая; нетленныя жизни Твоя песнословцы сподоби.

По полиелеи седален:

Житейская волнения и печали мирския, Алексие, старче Московский, глубину души твоея не поколеба, в молитве пред Зиждителем припадующую выну; Егоже лицезрети в Трисиянном свете ныне сподобился еси.

Слава, и ныне, Богородичен:

Со Архангелом Деве принесем целование: радуйся, Духа Святаго приимшая; радуйся, Бога Слова вместившая; радуйся, велией тайне воплощения послужившая; радуйся, Благодатная, Господь с Тобою.
Прокимен, глас 4: Ч естна пред Господем смерть преподобных Его.
Стих: Ч то воздам Господеви о всех, яже воздаде ми?

Евангелие от Матфея, зачало 43.
По 50-м псалме стихира, глас 6:

Днесь светоносное торжество; / приидите вси вернии, / восхвалим угодника Божия, вопиюще сице: / радуйся, огнезрачный столпе, озаряя нас чудес светлостьми; / радуйся, тихое дыхание, бурю умиряя страстей; / радуйся, росный облаче, орошая доброплодныя начатки мысленныя; / старче праведне Алексие.

Канон Богородице на 4 и святому праведному Алексию на 8, глас 4.
Песнь 1
Ирмос: О тверзу уста моя:

С е ныне приступаю восхвалити светильника Божия Алексия, старца Московскаго; укрепи, Владыко Христе, направи сердце и ум, отверзи уста воспети достойно святаго угодника Твоего.
К то возглаголет труды и подвиги твоя, отче Алексие: ты бо присно в служении ближним пребывая, Всевышнему же неизменно духом предстоя, в мире пожив, премирен явился еси.
С небесными лики песньми немолчными Святую Троицу воспевати сподобился еси, Царствия наследниче, Алексие; и о прославляющих тя моли, во еже спастися нам.
Богородичен: Е гоже трепещут херувими и серафими во объятиях носившая, Дево Пречистая, с матерним дерзновением Того моли спасти любовию поющих тя.

Песнь 3
Ирмос: Т воя песнословцы:

С о упованием на милость Божию святитель Филарет о рождении твоем молися усердно у Престола Владычня, избранника Христова провидя тя, еще суща быти ти во утробе матерней.
Д обрая отрасль родителей благочестивых прозябл еси, преславне; от нихже восприял еси веру крепку и любовь нелицемерну к Создателю и ближним твоим.
Р евнуя великому наставнику, пламенному светильнику Божию Филарету и того последуя подвигом и трудом, Спасу Христу благоугодил еси, отче праведне.
Богородичен: Г лаголы благовещения радоватися Пречистей Деве архангел повеле; радость бо Тоя рождества растворяет печаль Адамову и весь род человеческий возводит к веселию вечному.

Ин кондак, глас 2:

Велия труды любве и милосердия подъял еси, / праведный старче Алексие, / от святаго пастыря Кронштадтскаго благословение на помощь страждущим прияв, / беды и скорби людския яко вериги на рамо свое возложи. / Мы же ведуще тя молитвенника дерзновенна ко Господу, / со умилением зовем ти: / моли Христа Бога спастися душам нашим.

Седален, глас 8:

Явлей Господь велию милость людем Российстей земли, посла тя, отче Алексие, избранника Своего, лучами света Божественнаго просветившаго сердца во отчаянии, бедах и скорбех сущия.

Слава и ныне, Богородичен:

Мати Бога Слова, како изглаголати возможем Твое Пречистое рождество, или киими словесы прославим непостижное милосердие Божие и Твою, Пренепорочная, любовь к роду нашему, ко спасению возведенному Крестом Сына Твоего.

Песнь 4
Ирмос: С едяй в славе:

И з млада Христа возлюбивши и всецело душу предаде в руце Божии, кроток и послушлив быв; волю рождшей тя исполнивши, на путь священства вступи; в сем же трудолюбно подвизался еси.
А нгели сослужаху ти, отче, егда в безлюдном храме неустанно молитвы возношаше у Престола Божия; укрепляяся духом и распалаяся любовию Божественною, даров высших сподобился еси.
Р адоватися повеле ти пастырь Кронштадтский, егда свет помрачися во очесех твоих от рыданий горьких и слез по успении супружницы верныя; тойже к подвигу старчества тя призывая рече: «Отрещися себе, отверзи сердце прияти тяжкия скорби и беды людския».
Богородичен: К Заступнице и Владычице, и Матери Спаса нашего слезно возопиим вкупе со старцем Алексием: разреши, Пресвятая, болезни и скорби, утоли всякия нужды и печали; да возрадуемся и возвеселимся о Господе.

Песнь 5
Ирмос: У жасошася всяческая:

Я рем старчества в терпении носившии, любовь ко Христу и ближним и друг ко другу имевшии, праведне Алексие Московский и преподобне Анатолие Оптинский, в нескончаемой радости ныне торжествуя, молите спастися славлящих вы.
В идя подвиги и труды твоя, старче Алексие, скитоначальник оптинский Феодосий удивляшеся, рече: «Единому сие не под силу есть; Господь ти помогает, отче».
Д ревним отцем наследниче и оптинским подвижником собеседниче, светозарением добродетелей сияюще, во граде яко в пустыни подвизался еси, слезами и молитвами безводную верою тую оросивый.
Богородичен: Д ево Пречистая, Духа Святаго приятелище, приими и наша грешных молитвы, очисти всяку скверну душевную, да просветимся неприступным светом славы Сына Твоего.

Песнь 6
Ирмос: Б ожественное сие:

Р адости исполнишася московстии людие, обретоша в тебе заступника непреложнаго; плачущаго с плачущими, враждующих примиряющаго, вземлющаго на плещи твоя немощи человеческия, утоляющаго непосильную скорбь и печаль.
Е гда приспе время испытаний и волны гневныя обыдоша землю Русскую, тогда возсия ясно свет души твоея; Божественною любовию исполнен, сеял еси ю во оляденевшия сердца, научая во Христе обретати спасение.
О теческую любовь являя чадом твоим, любоблаже отче, молитвою исцелял еси недужныя, защищал еси от злых человек, глада и смерти. Не престай в водительстве сем и ныне: укрепи во испытаниях, избави от ненависти и всякия злобы, милосердие Божие призывая.
Богородичен: С траждеши слезяще, Всемилостивая, грядущия беды отечеству нашему предвозвещая; из очес Твоих с чудотворныя иконы Феодоровская истекаемыя, старцем Алексием и всеми предстоящими во храме на молитве зримыя.

Кондак, глас 8:

Простотою веры высоты смирения достигл еси; / в молитве и доброделании подвизаяся, дарами духовными обогатился еси; / светом Христовым просветился, помощниче и утешителю отче Алексие. / И ныне веру нашу укрепи и любви ко Господу и ближним научи, / и ко спасению приведи молитвами твоими.

Икос:

Праведне отче Алексие, старче Московский и всех православных радование; кто зря светолепное лице твое и сияние очес твоих благоговения не исполнися; или кто, слыша смиренномудрыя речи твоя, не умилися, возжелая в делании угодити Богу; или кто во мрак отчаяния впадый и утешен тобою быв, не покаялся и верным чадом Христовым не содеяся; или кто, гневлив и злоречив сый, тихостию нрава твоего не преложися. Темже священную память твою празднующе, молим тя: веру нашу укрепи, любви ко Господу и ближним научи, заповеди Христовы исполнити помози и ко спасению приведи молитвами твоими.

Песнь 7
Ирмос: Н е послужиша твари:

«А з помолюся», - отвещевал еси, старче богомудре, на всяко прошение, скорбь и беду, душею сокрушенною и духом смиренным пред Милосердым Владыкою предстоя; молися и ныне, ходатаю наш о вопиющих верно: препетый отцев Господь и Бог благословен еси.
Д уша твоя чистотою и светлостию сияя, отче незлобиве, даром слезным обогатися; «Бог милостив, чадо, и мы сынови Его есмы вси», - со умилением учил еси; во всяком обстоянии не престаяй взывати: препетый отцев Господь и Бог благословен еси.
«Б ог даде мне тверду детску веру», - в простоте поведал еси отче мудре; посреде злонравия богомерзкаго вера твоя многих ко спасению приведе и научи воспевати: препетый отцев Господь и Бог благословен еси.
Богородичен: М илосердая Мати, не презри недостойных молений наших, молящи вкупе со святыми покровители храма сего Сына Твоего спасти всех воспевающих Тя.

Песнь 8
Ирмос: О троки благочестивыя:

«П ри погребении моем радость обрящете», - прозорливо провещал еси, отче, радуяся отшествию своему во отечество Горнее, патриаршим же благословением утешение чадом подавая, взывающим: Господа пойте дела и превозносите Его во вся веки.
И щущим тебе обретаешися готовый помощник и скоро подаеши благодатную помощь; якоже иногда болящаго Александра сотворил еси здрава, и сына матери возвратил еси, и от напрасныя смерти избавил еси; посети убо и нас, отче щедре, твоею помощию, поющих: Господа пойте дела и превозносите Его во вся веки.
С вятыя Твоя, Господи, с сонмом безплотных ангельски воспевают Тя; с нимиже новый угодник, старец Московский Алексий совозсиял есть, вопиюще: Господа пойте дела и превозносите Его во вся веки.
Богородичен: М ати Божия Всенепорочная, души язвы исцели, сласти плоти утоли, ум умири от всякаго вреда, и вражиих избави напастей, превозносящих Тя во веки.

Песнь 9
Ирмос: В сяк земнородный:

П омози, теплый молитвениче наш, не малодушествовати во испытаниях крестных, сохранити верность Христу, за Него же ты готов был еси муки прияти и смерть; преемник же сын твой Сергий исповедник и священномученик явися.
Б уди и нам пастырем добрым, научая любве и вере, не устани воздвизати ны падающия, приведи, отче милосердый, во обители Небесныя, идеже ты в радости непрестанной пребываеши.
В оспеваем благосветлое житие твое, в немже яко верный раб Господень в малом и велицем верен бых; и ны, лукавыя и злонравныя, неленостно поработати Христу научи, да и мы очистившися внидем в радость Господа нашего.
Богородичен: В оспеваем Сына Твоего и Бога нашего, Мати Всесветлая, Дево Пречистая; Егоже непорочно роди на спасение наше и обновление.

Светилен:

Во свете незаходимем, отче Алексие досточудне, ныне предстоиши Престолу Святыя Троицы со ангелы и святыми и молиши о всех, верою блажащих тя.

Богородичен:

Благодатная Богородице Дево, предстояще Престолу Сына и Бога Твоего, моли о нас, хотящих спастися, уповая на милость Его безмерную.

На хвалитех стихиры, глас 8.
Подобен: О, преславнаго чудесе:

Р адуйся, первопрестольный граде Москва, / ликуй, Церковь Христова совокупльшися, / днесь созывает верных праведнаго Алексия торжество; / егоже песненными цветы увенчаем, зовуще: / О, светоносне старче Алексие, / ты бо на путь спасения множество заблудших наставляеши, / скорбящим душею божественное утешение даруеши, / от бед и обстояний ограждаеши, / и о всех просящих тя с верою Всевышняго умоляеши.
О, преславнаго чудесе, / слава твоя, милосерде отче Алексие, / града Тобольска достиже; / матери, зельне плачущей о сыне-воине, / Саровский чудотворец явися, / повелевая во престольном граде достигнути храма святаго твоего; / и та, вся исполнивше, утешение и надежду из уст твоих получи, / сына же обретше прослави Бога, / дивнаго во святых Своих.
Д ушу положи за ближния, старче Алексие / чад твоих сирых не оставити обещая, / пред исходом рекл еси: / «Аз же присно с вами буду!» / И ныне вечнуеши со Христом, Егоже всем сердцем возлюбил еси, / и Ему Единому в житии послужил еси; / мощми во храме святем твоем пребываеши, / и попечений о пастве не оставлявши, / являя на всяко дело благо незримую помощь твою.

Слава, глас и подобен тойже:

Богоугодно поживши, / Небесных обителей достигл еси, / добре стадо словесное упасл еси, наставниче богомудре, / темже со умилением вопием ти: / радуйся, кореню благий, от него же за Христа пострадавый сын-священномученик прозябе; / радуйся, лоза многоплодная, во чадех грозд зрел принесе. / И ныне у Престола Святыя Троицы не престай молити, / да сопричтет и нас Праведный Судия овцам избраннаго стада Своего / в страшный день судный.

И ныне, Богородичен:

О преславнаго чудесе, / Мати Божия и Царица / предстоит с лики бесплотных и святыми, / с нимиже новомученицы и исповедницы, и праведнии сродницы наша, / славя вкупе величие Владычне, / молят стране Российстей спастися; / мы же православно исповедающе, / поклоняемся Триединому и Триипостасному, / Всесильному и Всемилостивому Богу нашему.

На литургии

Блаженны на 8, песнь 3 и 6.
Прокимен, глас 7: Ч естна пред Господем смерть преподобных Его. Стих: Ч то воздам Господеви о всех, яже воздаде ми?
Апостол к галатом, зачало 213.
Аллилуиа, глас 6: Б лажен муж, бояйся Господа, в заповедех Его восхощет зело. Стих: С ильно на земли будет семя его.
Евангелие от Луки, зачало 24.
Причастен: В память вечную будет праведник, от слуха зла не убоится.

Выкладываю в «Уставные заметки» текст бденной службы новопрославленному украинскому святому - праведному Петру Калнышевскому. Служба составлена клириком Одесской епархии Украинской Православной Церкви протоиереем Илией Тетерько. О прославлении прав. Петра в лике святых я писал .

Служба праведному Петру Калнышевскому
На велицей вечерни
Б лажен муж: 1-й антифон.
На Г осподи, воззвах: стихиры, глас 4:

П риидите, вернии, / днесь стецемся на похвалу праведника богомудраго, / Петра, добраго воина Христова, / светом жития своего люди в вере утверждающаго, / Православия поборника, // выну благодарение Богу за вся приносити нас научающаго.
В ласти, славы и самаго себе отрекся, / и крест страданий взял еси на рамена своя, / с радостию Христу последовал еси, / и по Нем возшел еси в нетленную славу Царства Его, / Емуже днесь предстоя, угодниче Христов Петре, // моли спастися душам нашим.
Т вое сердце от юности разжже любовь Христова, / и настави к пути, ведущему во град Небесный, / имже шествуя, ведущим тя кротости и смирению, / достигл еси по желанию твоему Небесных обителей, / идеже днесь со Ангелы ликуя, преблаженне Петре, // моли спастися душам нашим.
О т благочестиваго корене израсл еси, / розго благоплодная, Петре всечестне, / измлада бо крест, яко оружие, на рамо твое приял еси, / веру, яко щит, надежду, яко шлем, / истиною же чресла твои препоясал еси. / Сего ради ликуя ныне со Ангелы, // непрестанно моли о душах наших.

Слава, глас 8:

П риидите, верных собори, / псалмы и песньми духовными / честь воздадим Начальнику спасения нашего, / во святых Своих дивному, / и тако возопиим: / Господи, молитвами Твоего угодника Петра блаженнаго, / спаси и ущедри всех, // благочестно поющих Тя.

И ныне, догматик, глас тойже: Ц арь Небесный:
Вход. Прокимен дне, и чтения 3.
Притчей чтение (главы 10, 3 и 8):

П амять праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.

Притчей чтение (главы 10 и 11):

У ста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.

Премудрости Соломоновы чтение (глава 4):

П раведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры храма и святаго, глас 1:

В Запорожской земли, якоже солнце, / возсиял еси чистотою твоею, / бремя правления народнаго право несый, и во брани оружием защищая люди твоя, / сугубыя чести сподобился еси, Петре Богомудре, / всех привлекая сердца и помышления / к твоим подвигом, преславне.

Слава, и ныне, Богородичен, глас тойже:

Р адуйся, Святая Богородице Дево, / чистый сосуде всея вселенныя, / свещe неугасимая, вместилище Невместимаго, / храме необоримый; / радуйся, из Неяже родися Агнец Божий, / вземляй грехи всего мира.

Стихиры на стиховне, глас 2:

П ения сладкая, / страданий твоих похваления, / благодеяний славословие, / благородства почествование, // приими, Петре блаженне.
Стих: П раведник, яко финикс, процветет, / яко кедр, иже в Ливане, умножится.
В осхвалим днесь песненно / Церкве Русския похвалу, / доблемудраго Петра, / храняща Отечество свое // ненаветно молитвами своими.
Стих: Б лажен муж, бояйся Господа, / в заповедех Его восхощет зело.
П равым подобает похвала / царственный пророк Давид рече / тем тебе, праведниче боголюбезный / Петре досточудный, // днесь песньми ублажаем.

Слава, глас тойже:

Т роицы вернаго служителя, / Церкве светильника всесветлаго, / Петра предивнаго / ныне, в память его сошедшеся, // воспоим любовию.

И ныне, глас тойже:

П ресвятая Мати Божия, / с лики преподобных / молися из Тебе Воплощенному, / Солнцу Правды, Господу, // спасти и просветити души наша.

Тропарь святаго, глас 4:

К орень правоверия, / напоенный благодатию Духа Пресвятаго, был еси, / Богоблаженне всечестне Петре, / многия храмы устрояя, / благочестия доброе правило явился еси людем твоим, / полки сопротивных одолел еси / и человеки ясно научил еси служити Единому в Троице Богу, // Егоже моли спастися нам.

Ин тропарь, глас 5:

Ц еркви верный сын явился еси, / Петре праведный, / во страданиих терпелив быв, / от земли отцев твоих отлучен, / Небеснаго Отечества достигл еси, / и гонения терпеливодушно претерпев, / дерзновение имаши молитися к Подвигоположнику Христу // спастися душам нашим.

На утрени
По 1-м стихословии седален, глас 1:

Н а земли живя, земная мудрствовати презирал еси, но, внимая словесем спасительным, весь ум твой вперял еси в Горняя, сего ради и сам ныне в Горних водворяешися, Петре чудне.

Слава, и ныне, глас тойже:

Н евесто Неискусобрачная, / премудрости село показася утроба Твоя Бога Слова: / Ты бо едина, Мати Божия, / благих Ходатаица явившися, / всяких страстей избави рабы Твоя, / непрестанно воспевающия славу Твою.

По 2-м стихословии седален, глас 8:

П амять твоя, славне страдальче Петре, украшает днесь Церковь Христову, призывающи нас песньми по достоянию восхвалити тя, Богомудре, яко воистинну воина Христова, темже мольбами твоими избави нас от бед и лютых обстояний.

Слава, и ныне, глас тойже:

Ч ертог, присносущною славою укрaшен, видяще выну, / желание имамы совнити в онь, / но, одежды не имуще, стыдимся, / да не связани от Ангел и извержени будем. / Ты, сущи одежда нагих дерзновения, Дево Марие, украси ны / и введи внутрь Небеснаго Чертога.

По полиелеи седален, глас 8:

Б лагочестно на земли в законе Господни пожив, / веру непорочну соблюл еси в сердцы твоем, / в злоключении скончав добрый подвиг, / семена добродетелей сеяв, / пожал еси плоды трудов твоих / и венец сугуб от руки Вседержителя приял еси, блаженне Петре, / и Того славы сподобился еси. / Темже, предстоя Святей Троице, / молися за Отечество твое и люди, // чтущия любовию святую память твою.

Слава, и ныне, глас тойже:

Б огородице Дево, / Вседержавная наша Царице, / омофором молитв Твоих покрывающая весь мир, / приими от благодарных сердец наших / похвальныя песни сия / и испроси нам у Сына Твоего Богоначальнаго // грехов прощение и велию милость.

Степенна, 1-й антифон, глас 4.

Прокимен, глас 4: В

В сякое дыхание: Евангелие от Матфея, зачало 16.
По 50-м псалме стихира самогласна, глас 6:

З ависти ради и злобы человеческия / заключение во обители Соловецкой / от единоверных приял еси, / Богомудре Петре праведне, / подвигами славнаго жития твоего / сонму мучеников и преподобных сочитался еси, // с ними же молися спасися душам нашим.

Канон святому, глас 2.
Песнь 1.

Ирмос: Г рядите, людие, поим песнь Христу Богу, раздельшему море, и наставльшему люди, яже изведе из работы египетския, яко прославися.
П одвиги и добродетели твоя славныя воспети сподоби, Петре чудне, дивному во святых Своих Богу славословие приносяще.
И змлада Христа возлюбил еси и Пречистую Его Матерь, всеблаженне Петре: храмы многия устроил еси, сего ради возвеличи тя Господь в житии твоем.
О Царстве Небеснем выну помышляя, Единаго всех Царя Бога возлюбил еси, с Нимже ныне водворяяся в Небесных обителех, моли Его о чтущих тя, Петре досточудне.
Богородичен: О брадованная Гаврииловым возвещением, Приснодево Чистая, рождшая на радость всех Бога, спаси молитвами Твоими Богородицу Тя почитающих.

Песнь 3.

Ирмос: Н а камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.
Х ристолюбиваго нрава никогдаже отлучаяся, всем убогим был еси благих милостивый податель, праведне Петре, и сирым заступник.
Д озревшим твоих добродетелей гроздием, неправедное заключение претерпел еси и увязлся еси венцем безкровнаго мученичества, и преподобных житию сочтался еси.
У красил еси подвиги своими обитель Соловецкую, преблаженне Петре, земных пристрастий отвергся, Небесный мир в сердце твое приял еси.
Богородичен: Н енасеянная земле, глаголом Божиим прорастившая Божие Слово, Того моли, Всепетая Богородице, избавитися нам от всяких зол и напастей.

Седален, глас 4:

С трастотерпцев подражателю, / не убоялся еси пострадати, / яко добр воин Иисус Христов, / изволением быв мученик. / Темже и с мученики венчался еси, Петре предивне, // от Подвигоположника Иисуса.

Слава, и ныне, Богородичен:

П окров Твой, Дево Богородице, простри над смиренными воспеватели Твоими и сохрани нас от бед и скорбей, матернюю любовь к нам недостойным являюще.

Песнь 4.

Ирмос: П ришел еси от Девы, не ходатай, ни Ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.
Н и молва мирская, ни слава ратная, ни богатство временное, нижe затворение неправедное твоего к Богу устремления не угасиша, Петре достохвальне, возлюбил бо еси крепко богоугодныя подвиги.
У чения отеческая храня невредимо, от юности имел еси житие чистое и милосерд был еси, Петре досточудне.
С лушаяй молитвы праведных Твоих, Господи, усльппи молитву и праведника Твоего Петра, юже приносит Тебе о роде своем.
Богородичен: П речистая Дево Богоотроковице, матерним Твоим взором призри на нас, страстьми плененных, и от рова греховнаго изведи нас.

Песнь 5.

Ирмос: С вета подателю и веков Творче, Господи, во свете Твоих повелений настави нас; разве бо Тебе иного бога не знаем.
С вятыя Богородицы чудотворный образ Новокайдакский украсил еси, досточудне Петре, всю свою надежду на Первообразную полагая в житии своем, ведый Тоя всесильное заступление.
Ц ерквей основатель и украситель был еси, преблаженне, храм светозарен Господеви имея сердце твое; храмы и нас соделай Духу Святому богоприятными твоими молитвами, Петре всечестне.
Я коже злато огнем, праведне, страданьми себе очистив, красно показал еси Творцу жилище, сего ради тебе порфиру нетленну вечнаго блаженства дарова Господь.
Богородичен: В седержителя Господа явилася еси вселение, Мати Преблагословенная, идеже Бог человеку сочетася.

Песнь 6.

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
И згнание, клевету и злобу людскую претерпел еси, Петре добропобедне, всегда упование возлагающе на Господа Спасителя твоего.
Р од, и богатство, и державу отъяша от тебе завистцы, ты же взем крест свой, подвизался еси богоугодно, тем ныне с преподобных лики радуешися.
Р евновав в добродетелех Богомудрым отцем, Евангельское семя Божия слова в сердце твоем насадил еси, и плод принесл еси Владыце, тем и мзду от Него приял еси достойную.
Богородичен: И сцели изъязвленную страстьми душу мою, Пречистая, матернею Твоею молитвою Божественное врачевание прилагающе.

Кондак, глас 8:

В збранному в ратех и преудобренному в праведницех, / православною мудростию сияющему великому воеводе, / благодарственная восписуем ти, блаженне: / ты же, яко имеяй дерзновение у Престола Христова, / сохраняй молитвами твоими люди твоя, / верою тя чтущия и воспевающия ти: // Радуйся, Петре, Отечества нашего похвало и утверждение.

Икос:

В сечестную память почтим угодника Христова, Петра благовернаго, благочестием от юности украшена, и радостныя глаголы от сердца воззовем к нему, сице вопиюще: Радуйся, от юности Бога возлюбивый; радуйся, благочестия столпе, вражиими прилоги непоколебимый; радуйся, заповедей Господних исполнителю усердный; радуйся, преданий отеческих хранителю неослабный; радуйся, воинству православному споборниче; радуйся, православных людей защитниче. Радуйся, Петре, Отечества нашего похвало и утверждение.

Песнь 7.

Ирмос: Д а преславное рождество Твое, Христе, еже от Девы прообразиши яве, неопалимы в пещи отроки сохранил еси, песньми поющыя Тебе: отцев, Боже, благословен еси.
Щ итом ограждаем благочестия, был еси, блаженне, образ всем людем, прежде народнаго правления бремя несый, послежде в обители Соловецкой неисходно пребываяй, на всяко время Господеви поя: отцев Боже, благословен еси
С илою Божиею укреплен, плотския удержал еси стремления и ум направил еси к Небесным, поя в крепости: отцев, Боже, благословен еси.
П риидите, людие, песньми похвальными прославим нашего заступника, достохвального и Богомудраго атамана Петра, благочестно поюще: отцев наших Боже, благословен еси.
Богородичен: Л юбоблагоутробная Мати, не престай о нас молящися, Дево, яко верным Ты еси утверждение и крепость Божественная.

Песнь 8.

Ирмос: П ещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.
В еликое твое заступление и добродетели воспоминаем, Богоблаженне Петре, и сего ради собравшеся в день памяти твоея, яко общему за всех нас предстателю, хвалу воздаем ти, воспевающе: благословите, вся дела Господня, Господа.
Т рудолюбием плоть свою изнурил еси, всечестне, и безстрастием боголюбивую душу твою возрастил еси, в нюже благодать Пресвятыя Троицы всельшися, всего тя светоносна содела, непрестанно вопиюща: благословите, вся дела Господня, Господа.
Н а Небесех ликуют чини ангельстии, блаженне Петре, и верных собори на земли, память твою похваляюще, вопиют: благословите, вся дела Господня, Господа.
Х ристу Богу молися, великий наш заступниче, о приходящих к тебе с верою и тепле вопиющих: благословите, вся дела Господня, Господа.
Богородичен: А гница Непорочная, Рождество Свое на Кресте распинаема зрела еси, грех мира сокрушающее. Темже Тя, Мати, чтим во вся веки.

Песнь 9.

Ирмос: Б езначальна Родителя Сын, Бог и Господь, воплощься от Девы нам явися, омраченная просветити, собрати расточенная: тем всепетую Богородицу величаем.
Н есумненная надежда был еси сыновом запорожским к защищению отечества, но Премудрый о всех Промыслитель благоволи тя прияти безмятежна в покой Свой, идеже увязлся еси нетленными венцы.
М удрость Небесную стяжав и разум имый Богом просвещен, смирением сердца украшен и высотою жития сияяй, к Небесным прешел еси обителем, идеже нас помяни, почитающих тя, Петре досточудне.
П амять празднственную и благ всех ходатайственную совершаем честнаго Твоего от земли преставления: ты бо угодник Господень и заповедей Того делатель явился еси непостыден, Петре всечестне.
Богородичен: Ю зилищ адских Опустошителя рождшую, Чистую Деву, Матерь Бога Слова, в песнех хвалебных присно величаем.

Светилен, глас 2:

Б огом возженный светильниче Церкве пресветлый, Петре достохвальне, освящение испроси душам нашим, твоими теплыми ко Господу молитвами.

Слава, и ныне, Богородичен:

С лавословие Тебе приносим, Мати Дево, явившей миру Свет Присносияющий, тьму неверия и греха расточающий, и присною радостию души наша исполняющий.

На хвалитех стихиры святаго, глас 1:

Т воих подвигов достойно приял еси честь / и, венценосец, ныне на Небесех со Ангелы веселишися, / идеже пророков собор, и апостолов, / и мучеников истинно воинства многая, / идеже патриархов лики; // поминай нас, Петре чудне.
О верно творящих твою память / и многия подвиги и страдания твоя поющих, / не престай моля, блаженне Петре, / присно сохранити от бед и скорбей / и будущия сподобитися жизни, // праведниче славне и приснопамятне.
С тяжал еси первее честь земную, / славою народоправления украсився, / послежде подвиги постническия и безвинная страдания восприял еси, / достоблаженне Петре, / Темже и ныне не отрини нас от твоего заступления, // любовию восхваляющих тя.
П амять твоя во век пребывает, славне Петре: / аще бо и преставился еси от нас, / но не отступаеши от нас духом любве твоея, / Божию Престолу предстоя и со Ангелы ликуя на Небесех, // с нимиже моли помиловати Отечество наше // и даровати нам велию милость.

Слава, глас 8:

В еселия исполняется днесь земля Запорожская, / и обитель Соловецкая красуется / в торжестве предивнаго и Богомудраго Петра, / и с ними вси народи Отечества нашего ликовствуют, / прославляюще единаго от воевод великих, / исповедника твердаго, добродетельми сияющаго, / и с любовию вопиют ему: / спасай нас молитвами твоими, // Петре, присный наш предстателю.

И ныне, глас тойже:

В ладычице, приими молитвы раб Твоих / и избави нас // от всякия нужды и печали.

Славословие великое и отпуст. И бывает помазание братии от лампады святаго.
На литургии

Блаженны от канона песнь 3-я и 6-я.
Прокимен, глас 4: В озвеселится праведник о Господе / и уповает на Него.
Стих: У слыши, Боже, глас мой, внегда молитимися к Тебе.
Апостол ко Ефесеем, зачало 233.
Аллилуиа, глас 4: П раведник, яко финикс, процветет, / яко кедр, иже в Ливане, умножится.
Стих: Н асажденнии в дому Господни во дворех Бога нашего процветут.
Евангелие от Матфея, зачало 11.
Причастен: В память вечную будет праведник:

Молитва

О, Петре всеславне, праведниче достоблаженный! Услыши моление нас, грешных, добродетельное твое житие похваляющих, ратныя подвиги чтущих и страдания почитающих! Теплым твоим предстательством умоли Господа, да простит наши согрешения вольная и невольная и очистит нас от всякия скверны плоти и духа! Молим тя, Петре терпеливодушный, испроси нам у Христа в вере и благочестии крепкое стояние, в скорбех благодушие, в напастех терпение, в искушениих крепость, да соблюдет от суемудрых и душетленных учений, да сохранит сердца наша от соблазнов мира сего и да научит чистоте и целомудрию. Ей, угодниче Божий, исходатайствуй молитвами твоими у Христа Бога по молитвам Его Пречистой Матери Отечеству нашему мир и благоустроение, всем же нам в правоверии, чистоте и целомудрии всегдашнее пребывание, избавление от козней диавольских и злобы человеческия, от суемудрых и душетленных учений; яко да и мы купно с тобою и всеми нашими святыми сродниками прославим Единосущную Троицу, Отца и Сына и Святаго Духа, во веки веков. А минь.

Тропарь, глас 5:
Ц е ркви верный сын яви лся еси,/
Петре-козаче пра ве дный,/
во страда ниих терпели в бы в,/
от земли отце в твои х отлуче н,/
Небеснаго Отечества дости гл е си ,/
и гоне ния терпеливоду шно претерпе в,/
дерзнове ние имаши молитися к Подвиго- поло жнику Христу //
спасти ся душа м на ши м.

Кондак, глас 8:
В збранному в ратех и преудобренну в пра ведницех,/ православною мудростию сияющему великому воево де,/ благодарственная восписуем ти, блаже нне:/ ты же, яко имеяй дерзновение у Престола Христо ва,/ сохраняй молитвами твоими лю ди твоя,/ верою тя чтущия и воспева ющия ти:// Радуйся, Петре, Отечества нашего похвало и утвержде ние .

На велицей вечерни

Б лажен муж: 1-й антифон.

На Г осподи, воззвах: стихиры, глас 4.

П риидите, вернии,/ днесь стецемся на похвалу праведника богомудраго,/ Петра, добраго воина Христова,/ светом жития своего люди в вере утверждающаго,/ Православия поборника,// выну благодарение Богу за вся приносити нас научающаго.

В ласти, славы и самаго себе отрекся,/ и крест страданий взял еси на рамена своя,/ с радостию Христу последовал еси,/ и по Нем возшел еси в нетленную славу Царства Его,/ Емуже днесь предстоя, угодниче Христов Петре,// моли спастися душам нашим.

Т вое сердце от юности разжже любовь Христова,/ и настави к пути, ведущему во град Небесный,/ имже шествуя, ведущим тя кротости и смирению,/ достигл еси по желанию твоему Небесных обителей,/ идеже днесь со Ангелы ликуя, преблаженне Петре,// моли спастися душам нашим.

О т благочестиваго корене израсл еси,/ розго благоплодная, Петре всечестне,/ измлада бо крест, яко оружие, на рамо твое приял еси,/ веру, яко щит, надежду, яко шлем,/ истиною же чресла твои препоясал еси./ Сего ради ликуя ныне со Ангелы,// непрестанно моли о душах наших.

Слава, глас 8:

П риидите, верных собори,/ псалмы и песньми духовными/ честь воздадим Начальнику спасения нашего,/ во святых Своих дивному,/ и тако возопиим:/ Господи, молитвами Твоего угодника Петра блаженнаго,/ спаси и ущедри всех,// благочестно поющих Тя.

И ныне, Догматик, глас тойже: Ц арь Небесный:

Вход. Прокимен дне, и чтения 3.

П ритчей чтение (главы 10, 3 и 8):

П амять праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея; в шуйце же ея богатство и слава. От уст ея исходит правда, закон же и милость на языце носит. Послушайте убо мене, о чада, честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз, премудрость, устроих совет и разум и смысл аз призвах: мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку, и отверзу от устен правая; яко истине поучится гортань мой, мерзки же предо мною устны лживыя. С правдою вси глаголы уст моих; ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша, и исполнитеся Духа.

П ритчей чтение (главы 10 и 11):

У ста праведнаго каплют премудрость: язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая мерзость пред Господем: вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, вместо же его предается нечестивый. Во устех нечестивых сеть гражданом, чувство же праведных благопоспешное. Во благих праведных исправится град, усты же нечестивых раскопается. Ругается гражданом лишенный разума, муж же мудрый безмолвие водит.

П ремудрости Соломоновы чтение (глава 4):

П раведник, аще постигнет скончатися, в покои будет. Старость бо честна не многолетна, ниже в числе лет исчитается. Седина же есть мудрость человеком, и возраст старости, житие нескверное. Благоугоден Богови быв, возлюблен бысть, и живый посреде грешник, преставлен бысть. Восхищен бысть, да не злоба изменит разума его, или лесть прельстит душу его. Рачение злобы помрачает добрая, и парение похоти пременяет ум незлобив. Скончався вмале, исполни лета долга. Угодна бо бе Господеви душа его. Сего ради потщася от среды лукавствия. Людие же видевше, и не разумевше, ниже положше в помышлении таковое: яко благодать и милость в преподобных Его, и посещение во избранных Его.

На литии стихиры храма и святаго, глас 1:

В Запорожской земли, якоже солнце,/ возсиял еси чистотою твоею,/ бремя правления народнаго право несый, и во брани оружием защищая люди твоя,/ сугубыя чести сподобился еси, Петре Богомудре,/ всех привлекая сердца и помышления/ к твоим подвигом, преславне.

Слава, и ныне, Богородичен, глас тойже:

Р адуйся, Святая Богородице Дево,/ чистый сосуде всея вселенныя,/ свещé неугасимая, вместилище Невместимаго,/ храме необоримый;/ радуйся, из Неяже родися Агнец Божий,/ вземляй грехи всего мира.

Стихиры на стиховне, глас 2:

П ения сладкая,/ страданий твоих похваления,/ благодеяний славословие,/ благородства почествование,// приими, Петре блаженне.

Стих: П

В осхвалим днесь песненно/ Церкве Русския похвалу,/ доблемудраго Петра,/ храняща Отечество свое// ненаветно молитвами своими.

Стих: Б лажен муж, бояйся Господа,/ в заповедех Его восхощет зело.

Правым подобает похвала/ царственный пророк Давид рече/ тем тебе, праведниче боголюбезный/ Петре досточудный,// днесь песньми ублажаем.

Слава, глас тойже:

Т роицы вернаго служителя,/ Церкве светильника всесветлаго,/ Петра предивнаго/ ныне, в память его сошедшеся,// воспоим любовию.

И ныне, глас тойже:

П ресвятая Мати Божия,/ с лики преподобных/ молися из Тебе Воплощенному,/ Солнцу Правды, Господу,// спасти и просветити души наша.

Тропарь святаго, глас 5:

Церкви верный сын явился еси,/ Петре праведный,/ во страданиих терпелив быв,/ от земли отцев твоих отлучен,/ Небеснаго Отечества достигл еси,/ и гонения терпеливодушно претерпев,/ дерзновение имаши молитися к Подвигоположнику Христу// спастися душам нашим.

На утрени

По 1-м стихословии седален, глас 1:

Н а земли живя, земная мудрствовати презирал еси, но, внимая словесем спасительным, весь ум твой вперял еси в Горняя, сего ради и сам ныне в Горних водворяешися, Петре чудне.

Слава, и ныне, глас тойже:

Н евесто Неискусобрачная,/ премудрости село показася утроба Твоя Бога Слова:/ Ты бо едина, Мати Божия,/ благих Ходатаица явившися,/ всяких страстей избави рабы Твоя,/ непрестанно воспевающия славу Твою.

По 2-м стихословии седален, глас 8:

П амять твоя, славне страдальче Петре, украшает днесь Церковь Христову, призывающи нас песньми по достоянию восхвалити тя, Богомудре, яко воистинну воина Христова, темже мольбами твоими избави нас от бед и лютых обстояний.

Слава, и ныне, глас тойже:

Ч ертог, присносущною славою укрáшен, видяще выну,/ желание имамы совнити в онь,/ но, одежды не имуще, стыдимся,/ да не связани от Ангел и извержени будем./ Ты, сущи одежда нагих дерзновения, Дево Марие, украси ны/ и введи внутрь Небеснаго Чертога.

По полиелеи седален, глас 8:

Б лагочестно на земли в законе Господни пожив,/ веру непорочну соблюл еси в сердцы твоем,/ в злоключении скончав добрый подвиг,/ семена добродетелей сеяв,/ пожал еси плоды трудов твоих/ и венец сугуб от руки Вседержителя приял еси, блаженне Петре,/ и Того славы сподобился еси./ Темже, предстоя Святей Троице,/ молися за Отечество твое и люди,// чтущия любовию святую память твою.

Слава, и ныне, глас тойже:

Б огородице Дево,/ Вседержавная наша Царице,/ омофором молитв Твоих покрывающая весь мир,/ приими от благодарных сердец наших/ похвальныя песни сия/ и испроси нам у Сына Твоего Богоначальнаго// грехов прощение и велию милость.

Степенна, 1-й антифон, глас 4.

Прокимен, глас 4: В Стих: У В сякое дыхание:

Евангелие от Матфея, зачало 16.

По 50-м псалме стихира самогласна, глас 6:

З ависти ради и злобы человеческия/ заключение во обители Соловецкой/ от единоверных приял еси,/ Богомудре Петре праведне,/ подвигами славнаго жития твоего/ сонму мучеников и преподобных сочитался еси,// с ними же молися спасися душам нашим.

Канон святому, глас 2.

Песнь 1.

Ирмос: Г рядите, людие, поим песнь Христу Богу, раздельшему море, и наставльшему люди, яже изведе из работы египетския, яко прославися.

П одвиги и добродетели твоя славныя воспети сподоби, Петре чудне, дивному во святых Своих Богу славословие приносяще.

И змлада Христа возлюбил еси и Пречистую Его Матерь, всеблаженне Петре: храмы многия устроил еси, сего ради возвеличи тя Господь в житии твоем.

О Царстве Небеснем выну помышляя, Единаго всех Царя Бога возлюбил еси, с Нимже ныне водворяяся в Небесных обителех, моли Его о чтущих тя, Петре досточудне.

Богородичен: О брадованная Гаврииловым возвещением, Приснодево Чистая, рождшая на радость всех Бога, спаси молитвами Твоими Богородицу Тя почитающих.

Песнь 3.

Ирмос: Н а камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Х ристолюбиваго нрава никогдаже отлучаяся, всем убогим был еси благих милостивый податель, праведне Петре, и сирым заступник.

Д озревшим твоих добродетелей гроздием, неправедное заключение претерпел еси и увязлся еси венцем безкровнаго мученичества, и преподобных житию сочтался еси.

У красил еси подвиги своими обитель Соловецкую, преблаженне Петре, земных пристрастий отвергся, Небесный мир в сердце твое приял еси.

Богородичен: Н енасеянная земле, глаголом Божиим прорастившая Божие Слово, Того моли, Всепетая Богородице, избавитися нам от всяких зол и напастей.

Седален, глас 4:

С трастотерпцев подражателю,/ не убоялся еси пострадати,/ яко добр воин Иисус Христов,/ изволением быв мученик./ Темже и с мученики венчался еси, Петре предивне,// от Подвигоположника Иисуса.

Слава, и ныне, Богородичен:

П окров Твой, Дево Богородице, простри над смиренными воспеватели Твоими и сохрани нас от бед и скорбей, матернюю любовь к нам недостойным являюще.

Песнь 4.

Ирмос: П ришел еси от Девы, не ходатай, ни Ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.

Н и молва мирская, ни слава ратная, ни богатство временное, нижé затворение неправедное твоего к Богу устремления не угасиша, Петре достохвальне, возлюбил бо еси крепко богоугодныя подвиги.

У чения отеческая храня невредимо, от юности имел еси житие чистое и милосерд был еси, Петре досточудне.

С лушаяй молитвы праведных Твоих, Господи, усльппи молитву и праведника Твоего Петра, юже приносит Тебе о роде своем.

Богородичен: П речистая Дево Богоотроковице, матерним Твоим взором призри на нас, страстьми плененных, и от рова греховнаго изведи нас.

Песнь 5.

Ирмос: С вета подателю и веков Творче, Господи, во свете Твоих повелений настави нас; разве бо Тебе иного бога не знаем.

С вятыя Богородицы чудотворный образ Новокайдакский украсил еси, досточудне Петре, всю свою надежду на Первообразную полагая в житии своем, ведый Тоя всесильное заступление.

Ц ерквей основатель и украситель был еси, преблаженне, храм светозарен Господеви имея сердце твое; храмы и нас соделай Духу Святому богоприятными твоими молитвами, Петре всечестне.

Я коже злато огнем, праведне, страданьми себе очистив, красно показал еси Творцу жилище, сего ради тебе порфиру нетленну вечнаго блаженства дарова Господь.

Богородичен: В седержителя Господа явилася еси вселение, Мати Преблагословенная, идеже Бог человеку сочетася.

Песнь 6.

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

И згнание, клевету и злобу людскую претерпел еси, Петре добропобедне, всегда упование возлагающе на Господа Спасителя твоего.

Р од, и богатство, и державу отъяша от тебе завистцы, ты же взем крест свой, подвизался еси богоугодно, тем ныне с преподобных лики радуешися.

Р евновав в добродетелех Богомудрым отцем, Евангельское семя Божия слова в сердце твоем насадил еси, и плод принесл еси Владыце, тем и мзду от Него приял еси достойную.

Богородичен: И сцели изъязвленную страстьми душу мою, Пречистая, матернею Твоею молитвою Божественное врачевание прилагающе.

Кондак, глас 8:

В збранному в ратех и преудобренному в праведницех,/ православною мудростию сияющему великому воеводе,/ благодарственная восписуем ти, блаженне:/ ты же, яко имеяй дерзновение у Престола Христова,/ сохраняй молитвами твоими люди твоя,/ верою тя чтущия и воспевающия ти:// Радуйся, Петре, Отечества нашего похвало и утверждение.

Икос:

В сечестную память почтим угодника Христова, Петра благовернаго, благочестием от юности украшена, и радостныя глаголы от сердца воззовем к нему, сице вопиюще: Радуйся, от юности Бога возлюбивый; радуйся, благочестия столпе, вражиими прилоги непоколебимый; радуйся, заповедей Господних исполнителю усердный; радуйся, преданий отеческих хранителю неослабный; радуйся, воинству православному споборниче; радуйся, православных людей защитниче. Радуйся, Петре, Отечества нашего похвало и утверждение.

Песнь 7.

Ирмос: Д а преславное рождество Твое, Христе,/ еже от Девы прообразиши яве,/ неопалимы в пещи отроки сохранил еси,/ песньми поющыя Тебе:/ отцев, Боже, благословен еси.

Щ итом ограждаем благочестия, был еси, блаженне, образ всем людем, прежде народнаго правления бремя несый, послежде в обители Соловецкой неисходно пребываяй, на всяко время Господеви поя: отцев Боже, благословен еси

С илою Божиею укреплен, плотския удержал еси стремления и ум направил еси к Небесным, поя в крепости: отцев, Боже, благословен еси.

П риидите, людие, песньми похвальными прославим нашего заступника, достохвального и Богомудраго атамана Петра, благочестно поюще: отцев наших Боже, благословен еси.

Богородичен: Л юбоблагоутробная Мати, не престай о нас молящися, Дево, яко верным Ты еси утверждение и крепость Божественная.

Песнь 8.

Ирмос: П ещь иногда огненная в Вавилоне действа разделяше,/ Божиим велением халдеи опаляющая,/ верныя же орошающая, поющия:/ благословите, вся дела Господня, Господа.

В еликое твое заступление и добродетели воспоминаем, Богоблаженне Петре, и сего ради собравшеся в день памяти твоея, яко общему за всех нас предстателю, хвалу воздаем ти, воспевающе: благословите, вся дела Господня, Господа.

Т рудолюбием плоть свою изнурил еси, всечестне, и безстрастием боголюбивую душу твою возрастил еси, в нюже благодать Пресвятыя Троицы всельшися, всего тя светоносна содела, непрестанно вопиюща: благословите, вся дела Господня, Господа.

Н а Небесех ликуют чини ангельстии, блаженне Петре, и верных собори на земли, память твою похваляюще, вопиют: благословите, вся дела Господня, Господа.

Х ристу Богу молися, великий наш заступниче, о приходящих к тебе с верою и тепле вопиющих: благословите, вся дела Господня, Господа.

Богородичен: А гница Непорочная, Рождество Свое на Кресте распинаема зрела еси, грех мира сокрушающее. Темже Тя, Мати, чтим во вся веки.

Песнь 9.

Ирмос: Б езначальна Родителя Сын, Бог и Господь, воплощься от Девы нам явися, омраченная просветити, собрати расточенная: тем всепетую Богородицу величаем.

Н есумненная надежда был еси сыновом запорожским к защищению отечества, но Премудрый о всех Промыслитель благоволи тя прияти безмятежна в покой Свой, идеже увязлся еси нетленными венцы.

М удрость Небесную стяжав и разум имый Богом просвещен, смирением сердца украшен и высотою жития сияяй, к Небесным прешел еси обителем, идеже нас помяни, почитающих тя, Петре досточудне.

П амять празднственную и благ всех ходатайственную совершаем честнаго Твоего от земли преставления: ты бо угодник Господень и заповедей Того делатель явился еси непостыден, Петре всечестне.

Богородичен: Ю зилищ адских Опустошителя рождшую, Чистую Деву, Матерь Бога Слова, в песнех хвалебных присно величаем.

Светилен, глас 2:

Б огом возженный светильниче Церкве пресветлый, Петре достохвальне, освящение испроси душам нашим, твоими теплыми ко Господу молитвами.

Слава, и ныне, Богородичен:

С лавословие Тебе приносим, Мати Дево, явившей миру Свет Присносияющий, тьму неверия и греха расточающий, и присною радостию души наша исполняющий.

На хвалитех стихиры святаго, глас 1:

Т воих подвигов достойно приял еси честь/ и, венценосец, ныне на Небесех со Ангелы веселишися,/ идеже пророков собор, и апостолов,/ и мучеников истинно воинства многая,/ идеже патриархов лики;// поминай нас, Петре чудне.

О верно творящих твою память/ и многия подвиги и страдания твоя поющих,/ не престай моля, блаженне Петре,/ присно сохранити от бед и скорбей/ и будущия сподобитися жизни,/ праведниче славне и приснопамятне.

С тяжал еси первее честь земную,/ славою народоправления украсився,/ послежде подвиги постническия и безвинная страдания восприял еси,/ достоблаженне Петре,/ Темже и ныне не отрини нас от твоего заступления,// любовию восхваляющих тя.

П амять твоя во век пребывает, славне Петре:/ аще бо и преставился еси от нас,/ но не отступаеши от нас духом любве твоея,/ Божию Престолу предстоя и со Ангелы ликуя на Небесех,// с нимиже моли помиловати Отечество наше// и даровати нам велию милость.

Слава, глас 8:

В еселия исполняется днесь земля Запорожская,/ и обитель Соловецкая красуется/ в торжестве предивнаго и Богомудраго Петра,/ и с ними вси народи Отечества нашего ликовствуют,/ прославляюще единаго от воевод великих,/ исповедника твердаго, добродетельми сияющаго,/ и с любовию вопиют ему:/ спасай нас молитвами твоими,// Петре, присный наш предстателю.

И ныне, глас тойже:

В ладычице, приими молитвы раб Твоих/ и избави нас// от всякия нужды и печали.

Славословие великое и отпуст. И бывает помазание братии от лампады святаго.

НА ЛИТУРГИИ

Блаженны от канона песнь 3-я и 6-я. Прокимен, глас 4: В озвеселится праведник о Господе/ и уповает на Него. Стих: У слыши, Боже, глас мой, внегда молитимися к Тебе. Апостол ко Ефесеем, зач. 233. Аллилуиа, глас 4: П раведник, яко финикс, процветет,/ яко кедр, иже в Ливане, умножится. Стих: Н асажденнии в дому Господни во дворех Бога нашего процветут. Евангелие от Матфея, зачало 11. Причастен: В память вечную будет праведник:

МОЛИТВА

О , Петре всеславне, праведниче достоблаженный! Услыши моление нас, грешных, добродетельное твое житие похваляющих, ратныя подвиги чтущих и страдания почитающих! Теплым твоим предстательством умоли Господа, да простит наши согрешения вольная и невольная и очистит нас от всякия скверны плоти и духа! Молим тя, Петре терпеливодушный, испроси нам у Христа в вере и благочестии крепкое стояние, в скорбех благодушие, в напастех терпение, в искушениих крепость, да соблюдет от суемудрых и душетленных учений, да сохранит сердца наша от соблазнов мира сего и да научит чистоте и целомудрию. Ей, угодниче Божий, исходатайствуй молитвами твоими у Христа Бога по молитвам Его Пречистой Матери Отечеству нашему мир и благоустроение, всем же нам в правоверии, чистоте и целомудрии всегдашнее пребывание, избавление от козней диавольских и злобы человеческия, от суемудрых и душетленных учений; яко да и мы купно с тобою и всеми нашими святыми сродниками прославим Единосущную Троицу, Отца и Сына и Святаго Духа, во веки веков. А минь.

НА МАЛЕЙ ВЕЧЕРНИ

На Господи, воззвах: стихиры, глас 1

Подобен: Всехвальнии мученицы:

От благочестиваго корене святолепная розга произшед,* плод произнесе любве и правды,* премирно благоухая верно от души чтущыя тя,* о нихже со Ангелы Христу молися, Феодоре,** даровати мир и велию милость.

Преславное твое житие* и подвизи велии, иже на мори,* всюду предивна тя показаша,* праведников благолепие, воевод похвало:* и, яко солнце, на земли лучи распростер, озарил еси верных сердца,* совершающих божественную твою память,** всехвальне Феодоре.

Благочестием и верою светло украшен,* яко мужествен воин, и преизряден, и преименит,* православнаго Отечества поборник был еси:* от негоже ныне ублажаемь,** моли даровати нам мир и велию милость.

Тирона и Стратилата храбрости подражая,* изволил еси братися за люди Божии,* темже и на злочестивых агарян нашед,* невредимь пребыл еси,* славу Отечеству твоему принося.* Ныне убо со святыми пребывая,** мирное житие у Господа испроси наследию твоему.

Слава, глас тойже:

Приидите, вернии, в честную обитель Санаксарскую,* велицыи и малии,* восхвалим теплаго предстателя и ходатая,* Христова воина и молитвенника,** праведнаго Феодора.

И ныне, Богородичен, глас тойже:

Радуйся, Богородице Дево,* радуйся, Похвало всея вселенныя,* радуйся, Пречистая Мати Божия, Благословенная.

На стиховне стихиры, глас 2

Подобен: Доме Евфрафов:

Дом добродетелей Святаго Духа* поспешением благодати* Феодор явися:* темже ныне сошедшеся,** тому воспоим.

Стих: Возвеселится праведник о Господе* и уповает на Него.

Радуйся, воевод русских похвало* и воинов соблюдение,* варваров побеждение,* сирот и вдов заступниче** и страны нашея утверждение.

Стих: Блажен муж, бояйся Господа,* в заповедех Его восхощет зело.

Приими ныне пение* последователей твоих, о воине,* и молящим ти ся у Христа испроси* на сопостаты одоление,** да ублажаем тя присно.

Слава, глас и подобен тойже:

Пристанище тя небурное* и стену необоримую* стяжахом, вернии,* яко флотоводца изряд­на** и военачальника предивна, Феодоре.

И ныне, Богородичен, глас и подобен тойже:

Тайно воспеваем Тя,* Мати Божия,* гласы православными,* яко Церковь блюдома есть** молитвами Твоими.

Тропарь зри на велицей вечерни

НА ВЕЛИЦЕЙ ВЕЧЕРНИ

Блажен муж: 1-й антифон

На Господи, воззвах: стихиры на 8, глас 2

Подобен: Киими:

Киими похвальными венцы* венчаим праведнаго Феодора;* людей благоверных защитника и воевод православных похвалу,* дивнаго в подвизех, безплотных сожителя,* источника Божественных дарований неисчерпаемаго,* егоже ради Христос земли Российстей** дарует мир и велию милость.

Киими похвальными венцы* увязем праведнаго Феодора;* градов мудраго здателя и управителя,* храмов Божиих светлаго украсителя,* врача премудраго и богоприятна,* исцеляюща недуги и болезни наша,* егоже ради врагов шатания Христос низложи,** имеяй велию милость.

Киими смиренными устнами* воспоем Фео­дора премудраго;* солнца светлейша молитвенника,* печальных утешение и порабощенных свободителя,* похвалу народов православных,* реку милости и больных врача безмездна,* ду­шу свою за други полагающа о Христе,** подающаго нам велию милость.

Киими духовными песньми* воспоем преславнаго воина;* архистратига искуснаго и непобедимаго,* врагом безбожным страшнаго,* прав­ды правило, веселие земли Российския,* крепость Отечества нашего и забрало,* сирот питателя, обидимых заступника,* столпа пресветлаго, просвещающаго нас благодатей светлостьми** и подающа велию милость.

Слава, самогласен, глас 4:

Людие и князи,* вкупе богатии и убозии, радуйтеся,* светлое днесь торжество празднующе непобедимаго воеводы,* праведнаго Феодора:* воспевайте убо, правовернии воини и простии людие,* общаго предстателя и помощника,** и молебника о душах наших.

И ныне, Богородичен, глас тойже: Иже Тебе ради:

Вход. Прокимен дне. И чтения три

Премудрости Соломоновы чтение (глава 3):

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их, и еже от нас шествие, сокрушение; они же суть в мире. Ибо пред лицем человеческим, аще и муку приимут, упование их безсмертия исполнено. И в мале наказани бывше, великими благодетельствовани будут, яко Бог искуси я и обрете их достойны Себе. Яко злато в горниле, искуси их, и яко всеплодие жертвенное, прият я. И во время посещения их возсияют и, яко искры по стеблию, потекут. Судят языком и обладают людьми, и воцарится Господь в них во веки. Надеющиися Нань разумеют истину и вернии в любви пребудут Ему. Яко благодать и милость в преподобных Его и посещение во избранных Его.

Премудрости Соломоновы чтение (глава 5 и 6):

Праведницы во веки живут, и в Господе мзда их, и попечение их у Вышняго. Сего ради приимут Царствие благолепия и венец доброты от руки Господни, зане десницею покрыет я и мышцею защитит их. Приимет всеоружие рвение свое и вооружит тварь в месть врагом. Облечется в броня правды и возложит шлем суд нелицемерен. Приимет щит непобедимый, преподобие, поострит же напрасный гнев во оружие, споборет же с ним мир на безумныя. Пойдут праволучныя стрелы молниины, и, яко от благокругла лука облаков, на намерение полетят. И от каменометныя ярости исполнь, падут грады, вознегодует на них вода морская, реки же потопят я нагло. Сопротив станет им дух силы и, яко вихор, развеет их, и опустошит всю землю беззаконие, и злодейство превратит престолы сильных. Слышите убо, царие, и разумейте, навыкните, судии концев земли. Внушите, держащии множества и гордящиися о народех язык, яко дана есть от Господа держава вам и сила от Вышняго.

Премудрости Соломоновы чтение (глава 4):

Праведник, аще постигнет скончатися, в покои будет. Старость бо честна не многолетна, ниже в числе лет изсчитается. Седина же есть мудрость человеком, и возраст старости житие нескверное. Благоугоден Богови быв, возлюблен бысть и живый посреде грешник преставлен бысть. Восхищен бысть, да не злоба изменит разума его, или лесть прельстит душу его. Рачение бо злобы помрачает добрая, и парение похоти пременяет ум незлобив. Скончався вмале, исполни лета долга, угодна бо бе Господеви душа его. Сего ради потщася от среды лукавствия. Людие же видевше и не разумевше, ниже положше в помышлении таковое, яко благодать и милость в преподобных Его и посещение во избранных Его.

Тропарь, глас 1

Державе Российстей архистратиг непобедимый явился еси,* агарянскую злобу нивочтоже вменив и разорив:* ни славы мирския, ниже богатства взыскуя,* но Богу и ближнему послужил еси.* Моли, святе Феодоре,* воинству нашему даровати на враги одоление,* Отечест­ву во благочестии непоколебиму пребыти** и сыновом Российским спастися.

НА УТРЕНИ

Слава, и ныне, Богородичен

По 1-м стихословии седален, глас 1:

Житейское море со многими подвиги и тру­ды преплыв, и в пристанище мысленное по­коя пристал еси: сосуд благочестия явлься, блаженне воине Феодоре, требующыя милости обогащай, Христа Бога моля даровати нам велию милость.

Слава, и ныне, Богородичен:

Радуйся, Российская похвало: радуйся, Церкве Божия украшение: радуйся, славо и заступниче Русския земли: радуйся, сирым прибежище: радуйся, богомудре Феодоре: радуйся, жителю рая: радуйся, верным забрало: радуйся, доме и жилище Святыя Троицы, Юже моли о почитающих всечестную память твою.

Слава, и ныне, Богородичен:

О Тебе радуется, Благодатная, всякая тварь, Ангельский Собор и человеческий род, освя­щенный Храме и Раю словесный, девственная Похвало, из Неяже Бог воплотися, и Младенец бысть, прежде век Сый Бог наш: ложесна бо Твоя Престол сотвори и чрево Твое пространнее Небес содела. О Тебе радуется, Благодатная, всякая тварь, слава Тебе.

Канон. Глас 1

Песнь 1

Ирмос: Поим Господеви песнь новую,* непро­ходимое бо оземленив чермное,* пешешествовати сотвори сыном Израилевым,** и сопротивныя враги покры море.

Просвети ми ум и озари моя чувства, со­грешений мрак души моея отгнав, Христе Боже, да чистою совестию возмогу песнь составити и возвеличити Твоего угодника, праведнаго воина Феодора.

Всесвятая Троице, Боже и Содетелю всего мира, поспеши и направи сердце, ум и уста наша достойно воспети велию славу добляго воина Твоего, благоверного адмирала флота Российского, Феодора Непобедимого.

Помянем, братия, како Божиею благодатию благоверный Феодор во граде Херсонстем ду­шу свою за ближних своих полагает, и от смер­тоносныя болезни многих спасает, и любовь ко злым и благим делом являет.

Яко волны морския на нас воссташа без­закония наша, яко кораблец в пучине вси мы обуреваемся от прегрешений многих, но в тихое пристанище настави нас, Господи, покаянием и предстательством благоверного воина Феодо­ра, и спаси нас.

Богородичен: Спаси нас, Мати Истины, обуре­ваемых люте от страстей и от сатрапов мыслен­ных и часто погружаемых, и исправи и нас, Чистая, ко спасения благоутишному пристанищу.

Песнь 3

Ирмос: Да утвердится сердце мое в воли Твоей, Христе Боже,* Иже над водами небо утверждей второе,** и основавый на водах землю, Всесилъне.

Ин канон. Ирмос тойже

Седален, глас 3

Песнь 4

Ирмос: Разумех, Всесильне,* Твое смотрение** и со страхом прославих Тя, Спасе.

Ин канон. Ирмос тойже

О селения исмаилитска, о агаряне зломудреннии, восплачите и возрыдайте, и познайте суетство веры магометовы, и преклонитеся пред Сотворшим видимое и невидимое, и Сыном Его Иисус Христом, и Духом Его Святым.

Песнь 5

Ирмос: Яко просвещение наше сый, Христе,* просвети нас, Защитителю жизни нашея** со­храни ны, надеющияся на Тя.

Просвети твое житие всю вселенную, святе Феодоре, правоверными делы сияющее, яко сол­нце, Триличнаго Божества зарею просвещаемь.

Иже на мори быв флотоводец искусен и непреборимь, испрос наследию твоему му­жество и веру непоколебиму, отгоняя присно врагов шатания.

Ин канон. Ирмос тойже

О, како неложный Боже, на островех Керкирских оружием благоволения венчаеши добляго Феодора, да низложит безбожие галльское, да не пребудут беззаконницы пред очима Твоима во веки!

Положу на мори руку Его и на реках дес­ницу Его: се бо, Господи Иисусе Христе, от лица верного раба Твоего, благоверного вои­на Феодора, изсекаеши вся враги его и ненавидящие его во Адриатстей пучине потопляеши.

Песнь 6

Ирмос: Обыде нас последняя бездна,* несть избавляяй,* вменихомся яко овцы заколения.* Спаси люди Твоя, Боже наш:** Ты бо крепость немощствующих и исправление.

Ин канон. Ирмос тойже

Господи Иисусе, верный раб Твой адмирал Феодор Непобедимый помощию Твоею вся оплоты галльския разоряет, и вся твердая их в страх и поношение окрестным языком полагает, и безбожие их в конец уничтожает.

Радуйся, нищих и сирых питателю и покровителю, радуйся, вдов защитниче, радуйся, юности наставниче, болящих утешение, пле­ненных отрадо и нам всем молитвенниче предивный!

О воине Феодоре! Услыши ны, во истине тя призывающыя, и прииди от горних селений к нам, во гресех утопающым, якоже Христос сквозе ветр дыхающ и мраз и тьму нощную ко учеником Своим, и помози нам.

Кондак, глас 2

Архистратиже Российский,* служителю на­рода Божияго,* нищих и угнетенных свободителю*, нечестивых наказателю,* полезнаго нам проси и велия милости,** яко споборник наш, праведне Феодоре.

Икос

Всечестную память почтим угодника Хрис­това, великаго Феодора, храбраго воина на сопостаты и кормчаго благоутишна, радостны­ми глаголы от сердца воззовем к нему, сице вопиюще:

Радуйся, дела благая со тщанием творивый;

Песнь 7

Ирмос: По множеству милости Твоея,* Че­ловеколюбче, сотвори с нами,* да Тебе верно вси, воспевающе, поим,* якоже отроцы:** благосло­вен еси, Боже отец наших.

Богородичен: Надеждо всем, Госпоже Богородице, разгони, Владычице, враги души моея и направи на стезю праву. Пощади, Помощнице и Надеждо христианская, Сыну Своему зовущи: благословен еси, Боже отец наших.

Ин канон. Ирмос тойже

О, чудесе! Якоже древле Давид пред сенным ковчегом, тако и ты, воине Феодоре, пред мощми дивнаго во святых святителя Спиридона Тримифунтскаго главу свою преклоняеши и крестным ходом истинное правоверие на Керкире паки утверждаеши.

О камение и горы, падите на мя и покрыйте мя, рече ересиарх латинский, услышав слух о воех твоих, о Феодоре, в Рим ветхий вхо­дящих и супротив галлов зловредных, якоже Гедеон супротив Амалика иногда, храбро опол­чающихся.

Песнь 8

Ирмос: Песнь Тебе приносим безплотных, * якоже отроцы в пещи,* и, поюще, глаголем:** благословите, вся дела Господня, Господа.

Ин канон. Ирмос тойже

Песнь 9

Ирмос: Радуйся, Пресвятая Богоприемная Марие,* радуйся, Пречистая, падших основание:* в Тебе бо явися днесь Владыка,* о, чудесе! обновляяй истлевшыя** и к свету возводя невечернему, Отроковице.

Ин канон. Ирмос тойже

О воине Феодоре! Ты днесь Престолу Божию предстоиши, и славу Его откровенным лицем созерцаеши, и тайны сокровенныя и страшныя Дня Суднаго разумеваеши.

О воине Феодоре! Помози нам молитвами своими и укрепи на брань супротив зверя, из моря исходяща, силу змия древняго имуща и престол сатаны содержаща и область велию, да не поклонимся ему, ниже послужим.

Не отчаивайтеся, рекл еси, о Феодоре: сия бури грозныя обратятся ко славе России. И ныне помози стране и людем нашим предстательством всемощным, да вера и любовь ко Отечеству восторжествуют, да возсияет слава новая боголюбезнаго царства русскаго.

Светилен

Слышана бысть во всех странах превеликая слава твоя, и тогда жены агарянския страшаху чада своя грозным твоим именем. И ныне, праведне, враги наша невидимо устрашай, опол­чающихся на христолюбивое твое воинство.

Слава, и ныне, Богородичен:

На хвалитех стихиры, глас 4

Подобен: Дал еси знамение:

Дал еси, Христе Боже, Российстей земли* заступника преславна, Феодора праведнаго,* всем в бедах скорого помощника,* вдов и сирот заступника,* пленных свободителя,* и нищих питателя,* и люди своя от всяких бед избавляющаго,* егоже молитвами даруй* градом и обителем нашим утверждение** и людем Твоим велию милость.

Дал еси, Христе Боже,* православней стране Российстей* крепкаго защитника,* Феодора непобедимаго,* вождем похвалу и утверждение,* врагов преславнаго победителя,* Отечество свое неотступно храняща,* егоже молитвами* даруй на враги победу** и людем Твоим низпосли велию милость.

Дал еси, Христе Боже,* всем православным людем Твоим, утешителя премилосердаго,* всехвальнаго Феодора,* скорбным всем предста­теля,* болящим врача предивнаго,* крепкое целомудрия забрало,* отчаянным непостыдную надежду,* егоже молитвами* вся вражия разруши шатания** и людем Твоим даруй велию милость.

Слава, глас 8, самогласен:

Приидите, Российстии вси православнии людие,* богатии и убозии,* честным мощем дивнаго Феодора поклонимся,* той нас избавит от рук неверных язык и злотворных человек,** и из рук ненавидящих нас молитвами его свободимся.

И ныне, Богородичен, глас тойже: Владычице, приими:

Молитва иная

Приникни, праведне воине Феодоре, с горних селений на притекающих к тебе и вонми молнию их: умоли Господа Бога даровати всем нам еже ко спасению нашему мы просим от Него, при святем твоем предстательстве. Ты великое, возложенное на тя служение тщательно проходил еси, и нас твоею помощию пребывати коегождо, в неже призван есть, настави. Ты, победив супостатов множества, и на нас ополчающихся всех видимых и невидимых врагов низложи. Умоли Господа Бога даровати крепкий и ненарушимый мир и земли плодоносие, пасты­рем святыню, законам правду и силу воена­чальникам мудрость и доблесть непобедимую, градоначальникам суд, флоту твоему Россий­скому и всему воинству нашему преданность вере и Отечеству и неодолимое мужество, всем же православным христианам здравие и благочестие. Сохраняй страну нашу Российскую и обитель сию святую от всех наветов вражиих, да словом и делом прославляется в них всесвятое имя Отца, и Сына, и Святаго Духа, ныне, и присно, и во веки веков. Аминь.

Тропарь

Возвеличивый житие твое молитвой и благочестием, святый мудрый и благий воине Феодоре, защитниче земли Российския, истинный хранителю веры православной, моли Христа Бога даровати нам, православным, путь ко спасению и велию милость.

Кондак

Якоже праведное светило возсиял еси, великий воине Феодоре, душу свою положивый за веру православную и землю Русскую. Подражателю кротости и поборниче мужества, пребыл еси непоколебимым проповедником веры, досточудными делы праведности сияяй, темже ныне честную память твою возносим дивно прославившему Тя Господу, да вси вернии вопием ти: радуйся, Святый праведный воине Феодоре, Адмирале флота Российскаго, непобедимый!

Молитва

Услыши в райских обителех, праведный воине Феодоре, молитвы притекающих к тебе, яки пребыл еси помощник дивный и при жизни своей. Ты осветил еси, праведниче, жизнь мира сего светом души твоея, милосердием истинным, заступничеством скорым и благим, исполнением заповедей Божиих. Ты явил еси, дивный защитниче Отечества Российскаго, образ кротости благодатной, мужества непоколебимаго и любви велией к вере православной. Буди и ныне заступник народу своему, покрый нас кровом предстательства твоего пред Всевышним и огради нас от нашествия иноплеменных и иноверных, укрепляя чистотою и смирением, нетленной верой во Христа, даруя победу на врага рода человеческаго. Добропобедный вождю, ниспосли доблесть воинству нашему, властем мудрость и правду, всем нам, православным христианом, чистую веру во Христа Бога нашего. Аминь.

СЛУЖБА святому праведному воину Феодору Ушакову

НА МАЛЕЙ ВЕЧЕРНИ